બ્રેડ નાળિયેરના લાડુ

સામગ્રી

laddu.jpgબ્રાઉન બ્રેડ – ૮-૧૦ સ્લાઇસ, કન્ડેન્સ્ડ મિલ્ક – ૧૦૦ ગ્રામ, નાળિયેરનું છીણ – ૧૫૦ ગ્રામ, બદામ – ૫૦ ગ્રામ (સમારેલ), કાજુ – ૫૦ ગ્રામ (સમારેલ), પિસ્તા – ૨૫ ગ્રામ (સમારેલ)

રીત

બ્રેડની સ્લાઇસનો બારીક ભૂકો કરી લો. ૫૦ ગ્રામ નારિયેળનું છીણ સાઇડ પર રાખી બીજું બધું છીણ તથા અન્ય સામગ્રી સારી રીતે ભેળવી લો. તેમાંથી થોડું થોડું મિશ્રણ લઇને લાડુ વાળો. તેને નાળિયેરના છીણમાં રગદોળો. બ્રેડ નાળિયેરના લાડુ તૈયાર.

Advertisements

ચોખાની કટલેસ

સામગ્રી

ચોખા – ૧ કપ, બટાકા – ૧ કપ (બાફીને ક્રશ કરેલા), પનીર – ૧ કપ (ક્રશ કરેલ), સેવ- ૨ મોટા ચમચા(તૈયાર), મગફળી – ૩ ચમચા (અધકચરી વાટેલી), કોથમીર – ૧ ચમચી (બારીક સમારેલી), કાજુના ટુકડા – ૨ ચમચા, મીઠું અને લાલ મરચું – સ્વાદ મુજબ, તેલ – તળવા માટે

રીત

cut-less.jpgચોખાને સાફ કરી ૨૦ મિનિટ સુધી અઢી કપ પાણીમાં પલાળો. એમાં ચમચી મીઠું અને એક નાની ચમચી તેલ નાખી ભાત બનાવો. ભાત ઠંડો થાય એટલે હાથ વડે મસળી લો. એમાં બટાકા, મીઠું અને મરચું ભેળવો. સેવનો ભૂકો કરી લો. પનીરમાં સેવ, મગફળી, કાજુના ટુકડા, કોથમીર અને લીલા મરચાં મિકસ કરો.

હાથ પર તેલ લગાવી થોડું ભાતનું મિશ્રણ લો. તેને હથેળીમાં ફેલાવી વચમાં પનીરવાળું મિશ્રણ મૂકી બંધ કરી તેને કટલેસનો અથવા તમને મનગમતો આકાર આપો. જયારે બધી કટલેસ તૈયાર થઇ જાય ત્યારે તેલમાં બ્રાઉન રંગની થાય ત્યાં સુધી તળી લો. ગરમ ગરમ કટલેસને ટામેટાના સોસ કે કોથમીરની ચટણી સાથે સર્વ કરો.

પાઇનેપલ, મેલન એન્ડ ગ્રેપ પંચ

image001
સામગ્રી

તરબૂચના ટુકડા -૨ કપ (બી કાઢેલાં), પાઇનેપલના ટુકડા -૧ કપ, લીલી દ્રાક્ષ – ૧ કપ, એપલ જયૂસ – ૨ કપ (ચિલ્ડ), ફૂદીનાના પાન – સજાવટ માટે

રીત

બધાં ફળના ટુકડાને એક બાઉલમાં લઇ તેના પર એપલ જયૂસ રેડી ફ્રીજમાં એકદમ ચિલ્ડ થવા દો. ઉપર ફૂદીનના પાનથી સજાવટ કરી ચિલ્ડ પાઇનેપલ, મેલન એન્ડ ગ્રેપ પંચ સર્વ કરો

સ્પાઇસી કેરોટ

સામગ્રી

ગાજર – ૮-૧૦ નંગ, ઓલિવ ઓઇલ – ૧ ચમચો, લસણની પેસ્ટ – નાની ચમચી, મરીનો પાઉડર – પોણી ચમચી, એલચીનો પાઉડર – અડધી ચમચી, તજનો પાઉડર – ચપટી, લીંબુનો રસ – ૩ ચમચા, સમારેલી કોથમીર – ૧ ચમચો, મીઠું – સ્વાદ મુજબ

રીત

carrot.jpgગાજરની લાંબી ચીરીઓ કરી તેને પાંચ-સાત મિનિટ એટલે કે સહેજ પોચા પડે ત્યાં સુધી બાફો. એક પેનમાં ઓલિવ ઓઇલ ગરમ કરી તેમાં લસણની પેસ્ટ, મરીનો પાઉડર, એલચીનો પાઉડર, તજનો પાઉડર નાખી સુગંધ આવે ત્યાં સુધી સાંતળો. તેમાં ગાજર, લીંબુનો રસ, મીઠું અને સમારેલી કોથમીર મિકસ કરો. ગાજર પર બધો મસાલો એકસરખો ચોંટી જાય એટલે તેને નીચે ઉતારી લો અને સ્પાઇસી કેરોટનો ટેસ્ટ માણો.

સેવ સ્ટફડ પરોઠા

સામગ્રી

ઘઉનો લોટ – ૨ કપ, પાતળી સેવ – અડધો કપ, જાડી સેવ – અડધો કપ, તેલ – ૧ ચમચો, સાંતળવા માટે, સમારેલી ડુંગળી – ૨ નંગ, સમારેલા લીલાં મરચાં – ૨-૩ નંગ, સમારેલી કોથમીર – ૧ ચમચો, સમારેલો ફુદીનો – ૧ ચમચી, લાલ મરચું – અડધી ચમચી, મીઠું – સ્વાદ મુજબ

રીત

paratha.jpgએક બાઉલમાં ઘઉનો લોટ લઇ તેમાં તેલ અને મીઠું ભેળવી પૂરતું પાણી લઇ નરમ કણક બાંધો. તેને ભીના કપડાંથી ઢાંકીને પંદર મિનિટ રહેવા દો. સમારેલી ડુંગળી, મરચાં, કોથમીર અને ફુદીનાને એક બાઉલમાં લઇ તેમાં મીઠું અને મરચું ભેળવો. આમાં જાડી અને પાતળી સેવ મિકસ કરો.

હવે કણકમાંથી લૂઆ લઇ તેની નાની નાની પૂરીઓ વણો. પૂરીની વચમાં સેવનું મિશ્રણ મૂકી તેનો ગોળો વાળો. ત્યાર બાદ તેના પરોઠા વણો. લોઢી ગરમ કરી તેના પર પરોઠાને એક તરફ શેકી બીજી બાજુ ફેરવી સહેજ તેલ મૂકી સાંતળો. એ સાઇડ બ્રાઉન થઇ જાય એટલે ફરી બીજી તરફ ફેરવી દો અને તેલ મૂકીને સાંતળો. ગરમ ગરમ સર્વ કરો.

મિક્સ વેજિટેબલ ઢોકળા

સામગ્રી

dokla.jpgચોખા – ૧૫૦ ગ્રામ, લસણ – ૧૦ ગ્રામ, અડદની દાળ – ૫૦ ગ્રામ, તેલ – ૧ ચમચી, મરચું – ૧ ચમચી, લીંબુનો રસ – ૧ ચમચી, દહીં – ૫૦ ગ્રામ, ફ્રૂટ સોલ્ટ – ૧૦ ગ્રામ, મીઠું – સ્વાદ મુજબ

રીત

ચોખા અને અડદની દાળને ભેગાં કરી આખી રાત પલાળી રાખો. પછી બધું પાણી નિતારી લો. તેમાં દહીં નાખી ગ્રાઇન્ડ કરી ઢોકળા માટેનું ખીરું તૈયાર કરો. બે કલાક સુધી રાખી મૂકો. લસણમાં મરચું અને લીંબુનો રસ ભેળવી પેસ્ટ બનાવી બાજુ પર રહેવા દો. હવે ખીરામાં ફ્રૂટ સોલ્ટ અને તેલ નાખી ખૂબ હલાવીને મિકસ કરો.

અડધા ભાગના ખીરાને ઢોકળાના વાસણમાં પાણી ગરમ કરી વરાળથી દસ મિનિટ બાફી લો. આ બફાયેલા ખીરા પર લસણની પેસ્ટનો એકસરખો થર પાથરો. તેના પર બાકીનું ખીરું પાથરી ફરી દસ મિનિટ સુધી બફાવા દો. પછી તેને બહાર કાઢી ચોરસ ટુકડા કરો. લસણવાળા ટેસ્ટી ઢોકળા તૈયાર છે.

રાજસ્થાની ટીકી

સામગ્રી

tikki.jpgબાફીને છૂંદો કરેલા બટાકાં – ૧૦૦ ગ્રામ, આરારૂટ – ૧૦ ગ્રામ, તેલ – જરૂર પ્રમાણે સ્ટફિંગ માટે : લીલા વટાણા – અડધી વાટકી, પનીર – ૧૦ ગ્રામ, જીરું – અડધી ચમચી, હળદર – ચપટી, મરચું – અડધી ચમચી, ગરમ મસાલો – અડધી ચમચી, મીઠું – સ્વાદ મુજબ

રીત

બાફેલા બટાકાનાં છૂંદામાં આરારૂટને સારી રીતે મિકસ કરો. ત્યાર બાદ તેમાંથી એકસરખા ગોળા વાળો. હવે સ્ટફિંગ માટેની બધી સામગ્રી મિકસ કરીને એક તરફ રહેવા દો. બટાકાનાં ગોળાને હથેળીથી ફેલાવી તેની વચમાં સ્ટફિંગ કરી ફરી ગોળો વાળી સહેજ દબાવીને ચપટા કરો. એક પેનમાં તેલ ગરમ કરી તેમાં આ ટીકીને તેલ મૂકી આછા બ્રાઉન રંગની સાંતળી લો. ક્રિસ્પી થાય એટલે એબ્સોર્બન્ટ પેપર પર કાઢી ટોમેટો કેચઅપ સાથે ગરમાગરમ સર્વ કરો.

પૂરણપોળી

puran poliસામગ્રી :

૫૦૦ ગ્રામ ચણાની દાળ, ૫૦૦ ગ્રામ ખાંડ, ૨૫ ગ્રામ કોપરાનું ખમણ, ૫૦૦ ગ્રામ ઘઉંનો લોટ, એલચી, ચોખાનો લોટ, તેલ -ઘી પ્રમાણસર.

રીત :

ચણાનીની દાળને કૂકરમાં બાફવી. બરાબર બફાઈ જાય મિક્સરમાં ક્રશ કરી એક તપેલીમાં ભરી, તેમાં ખાંડ ઉમેરી તાપ પર મૂકવું અને હલાવતાં રહેવું. તેમાં ૧ ચમચો ઘી નાખવું, જેથા છાંટા ઓછા ઉડે.

ખાંડનું પાણી બળી જાય એટલે અને એકદમ ઘટ્ટ બની જાય એટલે ઉતારી લેવું. તવેથો ઉભો મૂકીને જોવો. જો અઘ્ધર રહે તો જાણવું કે પૂરણ થઈ ગયું છે.

પછી તેમાં કોપરાનું ખમણ અને એલચીનો ભૂકો નાખી, થાળીમાં કાઢી લેવું. ઠંડુ પડે એટલે પ્રમાણસર ગોળા બનાવવા.

હવે ઘઉંના લોટમાં તેલનું મોણ દઈને તેની રોટલી જેવી કણક બાંધવી. એક કલાક કણકને ઢાંકીને રહેવા દેવી. ત્યારબાદ તેને કેળવવી. તેમાંથી લૂઆ પાડી, તેની લાંબી , પાતળી રોટલી ચોખાનાં લોટનું અટામણ લઈ વણવી.

પછી તેના ઉપર પૂરણનો ગોળો મૂકી, બાકીની રોટલી ઢાંકી દેવી. પછી હળવા હાથે વણી તવા પર શેકવી. શેકાય જાય એટલે ઉપર ઘી લગાવી પીરસો.

મિન્ટ સૂપ ‘ઑલ ટાઇમ સૂપ’

shuopઠંડી ભલે આવ-જા કરે પણ ઠંડકની ઋતુમાં મસ્તીભર્યું ખાવાનો આનંદ માણવા માટેનો મૂડ તો તેમનો તેમ રહે છે. ઠંડકની ઋતુમાં ગરમાગરમ, ચટપટું, અવનવું ખાવાનો આનંદ માણવા તો સૌ કોઇ ઉત્સુક હોય. મિન્ટ એટલે કે ફુદીનો એ સ્વાદમાં કંઇક નવો જ ચટકો ઉમેરે તેવી જ છે. ચા, સૂપ, સમોસા, સેન્ડવિચ એમ દેશીથી લઇને વિદેશી ફૂડ આઇટમ્સમાં પણ ફુદીનો વપરાય.

ધીમા તાપે ઓલિવ ઓઇલને ગરમ કરીને તેમાં પોટેટો અને ગાર્લિક સોસ ૫ મિનિટ સુધી હલાવો. ત્યારબાદ તેમાં ગ્રીન ઓનિઅન્સ નાખો. આશરે ૧૫ મિનિટ સુધી બટાકાને મેશ થવા દો પછી તેમાં સ્પિનેચ અને પોણો કપ જેટલો ફુદીનો નાખો.

સૂપને ૧ મિનિટ સુધી સીજવા દો. હૂંફાળો ગરમ કરીને તેમાં પેપ્રીકા ઓઇલ નાખી તેને સર્વ કરો. મિન્ટસૂપ સાથે બ્રેડક્રમ્સ નાખીને કે છીણેલી ચીઝ નાખીને ખાવાથી તે વધુ સ્વાદિષ્ટ લાગે છે. મિન્ટસૂપ ડિનર, લંચ, બ્રન્ચ, બ્રેકફાસ્ટ એમ દરેક વખતે સર્વ કરી શકાય છે. મિન્ટસૂપ એ ‘ઑલ ટાઇમ સૂપ’ તરીકે પોપ્યુલર બની રહ્યો છે.

પનીર ટિક્કી વિથ કોર્ન રગડા ચાટ

 સામગ્રી : બાફેલા બટાકા-૨૫૦ ગ્રામ, કોર્ન ફ્લોર- ૩ ચમચી, મીઠું-ટેસ્ટ પ્રમાણે, પનીર-૫૦ ગ્રામ, લીલા મરચા વાટેલા- ૨ ચમચી, કોથમીર- ૨ ચમચી, બાફેલા મકાઈના દાણા- ૨૫૦ ગ્રામ, ટામેટાની પ્યુરી- ૧/૪ કપ, કાંદાની પ્યુરી- ૪ ચમચી, લાલ મરચું- ૧ ચમચી, હળદર- ૧/૪ ચમચી, ધાણાજીરું- ૧/૨ ચમચી, ગરમ મસાલો- ૧/૪ ચમચી

ડેકોરેશન માટે :

આંબોળિયાની ચટણી, સમારેલા કાંદા- ૨ નંગ, કોથમીર, ઝીણી સેવ

રીત :

  1. સૌ પ્રથમ બટાકાના માવામાં કોર્ન ફ્લોર અને મીઠું ઉમેરી તૈયાર કરો.
  2. એક બાઉલમાં છીણેલું પનીર, લીલા મરચાં, કોથમીર, મીઠું નાખી સ્ટફિંગ તૈયાર કરો.
  3. ત્યારબાદ બટેકાના મિશ્રણની થેપલી બનાવી સ્ટફિંગ ભરી તેની ટિક્કી બનાવો અને ગરમ તેલમાં તળી લો.
  4. હવે, એક પેનમાં ૨ ચમચી તેલ મૂકી કાંદાની પેસ્ટ સાંતળો, ત્યારબાદ ટામેટાની પેસ્ટ સાંતળો. પછી તેમાં મીઠું, મરચું, હળદર, ગરમ મસાલો, બાફેલા મકાઈના દાણા નાખી મિક્સ કરો અને થોડું પાણી નાખી ખદખદવા દો.
  5. હવે ર્સિંવગ પ્લેટમાં ટિક્કી મૂકી ઉપરથી કોર્ન રગડો રેડો અને ઉપરથી કોથમીર, ઝીણી સેવ, આંબોળિયાની ચટણી અને કાંદાથી સજાવીને પીરસો.